RUBÉN PÉREZ: A PRÓRROGA DOS ORZAMENTOS DO CONCELLO DE VIGO PARA O 2012 AMOSAN QUE A PROPOSTA ANTERIOR ERA UN “BRINDE AO SOL”

O coordenador local de ESQUERDA UNIDA valorou hoxe a “retirada de novos orzamentos para 2012” e prórroga dos de 2011 como o “esperable” ante o feito de que a propia FEDERACIÓN ESPAÑOLA DE MUNICIPIOS E PROVINCIAS (FEMP) ten informado nunha circular aos concellos que ao producirse unha prórroga da Lei 39/2010 de decembro de Orzamentos Xerais do Estado a partir do 1 de xaneiro de 2012 vai ser dificil elaborar un orzamento a primeiros de ano.

Para Rubén Pérez as medidas aprobadas en Consello de Ministros o pasado 30 de decembro actuán de xeito negativo no desenvolvemento de servicios e inversións ás entidades locais, polo que un Concello como o de Vigo debería artellar dende xa unha política impositiva xusta en base ao criterio “quen máis ten máis paga” e unha política de gasto que erradique prácticas populistas como as obras públicas ornamentarias en tempos nos que as obras públicas necesarias (sistema de saneamento, rúas accesibles, alumeado, etc… sufren un deterioro evidente).

Rubén Pérez valora como perigoso incrementos indiscriminados no IBI para 2012 e 2013 que en Vigo afectarán á práctica totalidade dos inmobles en vez de facer valer o acordo do Congreso dos Deputados de gravar ás vivendas desocupadas con recargos do IBI de ate o 100%.

Prorrogar o orzamento, para Rubén Pérez, non asegura que se poidan seguir dando os servicios ou levando a cabo as inversións acordadas xa que a propia FEMP asegura que no capítulo de trasferencias do Estado ás entidades locais (cesión de porcentaxe do IRPF, IVA e impostos especiais) remítese ao que acorde a futura Lei Reguladora de Orzamentos Xerais do Estado para o ano 2012 que para EU será, evidentemente, basada en recortes orzamrntarios.

Igualmente EU considera grave que a proposta do goberno permita aos concellos o mantemento do gasto de personal en canto a altos cargos e “conxele” a oferta de emprego público municipal.

Esquerda Unida presenta un paquete alternativo de medidas fiscais para asegurar a redución do déficit público

EU CONSIDERA PROFUNDAMENTE INXUSTAS E POUCO EFICIENTES AS MEDIDAS DESENVOLVIDAS POLO GOBERNO DO PSOE

ESQUERDA UNIDA DEMOSTRA QUE OUTRA POLÍTICA É POSÍBEL CUN PAQUETE DE MEDIDAS FISCAIS QUE EVITA QUE SEXA A MAIORÍA SOCIAL QUEN PAGUE AS CONSECUENCIAS DA CRISE

O paquete de axuste do Goberno ten por obxectivo a redución do déficit das Administracións Públicas ata o límite do 3% en 2013 (desde o 12,2% actual). Para iso optou por unha política de recorte do gasto que afecta ás pensións, ao salario dos empregados públicos, ao investimento público, o emprego das Administracións e  certas prestacións sociais (lei de Dependencia, cheque.-bebé, etc).

Ademais de ser profundamente inxustas, estas medidas son pouco eficientes para reducir o déficit, posto que reducen o consumo e o investimento, xeran máis paro e, xa que logo, teñen un efecto moi negativo sobre  a recadación fiscal.

Esquerda Unida considera que a redución do déficit público só pode realizarse mediante o aumento da contribución fiscal dos que máis teñen e gañan, é dicir mediante unha reforma fiscal progresiva, que debe ser iniciada por un paquete de medidas urxentes, e cun plan serio de loita contra a economía mergullada e a fraude fiscal. Complementariamente a estas medidas, deben aplicarse en todas as administracións programas de racionalización e control do gasto público.

Para iso, Esquerda Unida defende as seguintes medidas:

1.-  Elevación do tipo impositivo marxinal no último tramo do IRPF (base liquidable superior a 53.407,20 euros; equivalente a uns 60.000 euros anuais de ingresos brutos) do 43 ao 50%.

2.-  Aumento de 5 puntos no imposto sobre beneficios (Imposto de Sociedades) das entidades, sociedades e institucións de intermediación financeira (Bancos, Caixas, Compañías de Seguros, Sociedades de Carteira, etc.).

3.-  Incremento de 3 puntos na tributación das empresas que cotizan en Bolsa e obteñen beneficios.

4.-  Creación dunha taxa sobre as transaccións en Bolsa do 0,2%.

5.-  Imposición extraordinaria do 50% dos bonos, primas e calquera outra retribución extrasalarial dos directivos de institucións financeiras, mentres dure a crise, entendido este fin como situar o índice de paro por baixo do existente a 1 de xaneiro de 2008.

6.-  Recuperación do Imposto de Patrimonio (2.147 millóns de euros en 2007, destinados ao Programa de Emprego das CCAA).

7.- Presentación do Goberno en función do seu exercicio da Presidencia Europea dun plan de converxencia e harmonización fiscal para os países da UE con calendario de aplicación.

8.-  Reorientación da reforma do IVE, eliminando a subida xeral de tipos que entrará en vigor o 1 de xullo e establecendo un IVE especial ao 25% (ou en caso necesario un Imposto especial ou o seu incremento en 7 puntos) para bens de consumo de luxo, animais vivos non destinados a consumo humano, xoias, abrigos e pezas de pel, aeronaves e embarcacións de vela e motor cuxo uso non se destine ao comercio marítimo ou á pesca profesional, etc.

9.-  Redución do IVE ao tipo super reducido (4%) de todos os alimentos e produtos de primeira necesidade.

10.- Adopción da proposta da Comisión de Finanzas das Asemblea Nacional  Francesa (setembro de 2009) no marco de Presidencia semestral española da UE  para suprimir os billetes de 500 euros e reducir a 3.000 euros as cantidades que se poden pagar en efectivo sen comunicación á administración tributaria dos datos do pagador a partir de 1 de xaneiro de 2011.

11.- Supresión da fiscalizade favorable das SICAV que deben tributar como calquera outra sociedade (así ocorre nas Facendas Forais de Euskadi).

12.-  Equiparación da contribución fiscal das rendas do capital e do traballo.

13.- Introducir medidas de fiscalizade verde para gravar as actividades que prexudiquen o medio ambiente e incentivar as que teñan efectos favorables, de acordo coa proposición de Lei de Fiscalizade Ambiental presentada por EU-ICV o pasado 21 de xullo de 2009.

14.-  Consideración no marco da UE da Taxa Tobin como unha ferramenta para financiar iniciativas industriais innovadoras nos sectores estratéxicos para un desenvolvemento xusto e sostible. Proposición das Directivas correspondentes.

15.- Adopción dun Programa de loita contra a Economía Mergullada e a fraude fiscal co obxectivo de reducir a Economía Mergullada e un total de 12 puntos de PIB no período 2010-2013 e duplicar os resultados na represión da fraude fiscal.

En definitiva esquerda unida demostra que outra política é posíbel cun paquete de medidas fiscais que evita que sexa a maioría social quen pague as consecuencias da crise.

Gabinete de Prensa
Secretaría de Comunicación
Executiva Nacional de Esquerda Unida